नेपालको राष्ट्रिय राजनीतिमा राप्रपा नेपाल फरक विचार, अलग पहिचान र राष्ट्रनिर्माणको वैकल्पिक मार्गचित्र बोकेर खडाभएको राजनीतिक दल हो। सनतान धर्म संस्कृति र परम्पराको रक्षा गरेर पनि देशको बिकास र आर्थिक समृद्धि कायम गर्न सकिन्छ भन्ने मान्यता राख्ने पार्टी हो राप्रपा नेपाल। राष्ट्रियता, लोकतन्त्र, सनातन हिन्दूराष्ट्र र उदार अर्थतन्त्रको अवधारणामा आधारित “सम्बर्द्धनवाद” को धरातलमा सुशासनको माध्यमबाट समृद्ध र समतामुलक समाज निर्माण राप्रपा नेपालको मुल लक्ष्य हो। 

सर्वधर्म समभाव र पूर्ण धार्मिक स्वतन्त्रतासहितको हिन्दूराष्ट्रको पुनःस्थापना राप्रपा नेपाल मुख्य उदेश्य हो।

राष्ट्रनिर्माता श्री ५ बडामहाराजाधिराज पृथ्विनारायण शाहलाई राप्रपा नेपालले आदर्श पुरुषकारुपमा आत्मसात गरेको छ । राष्ट्रनिर्माताको “दिव्य उपदेश” लाई राप्रपा नेपालले मार्गदर्शक सिद्धान्तकारुपमा ग्रहण गरेको छ। 

भष्टाचार नियन्त्रण र वेरोजगारी समस्याको समाधानलाई राप्रपा नेपालले मुख्य प्राथमिकतामा राखेको छ । नेपाली नागरिकको निम्ति गुणस्तरीय शिक्षा र स्वास्थ्यमा सहज पहुँच कायम गर्नु राज्यको प्रमुख दायित्व हो भन्ने हाम्रो विश्वास छ । राष्ट्रको सर्वाङ्गिण बिकासको लागि उर्जा, पर्यटन, उद्ययोग र पुर्वाधार बिकासलाई महत्व प्रदान गरिनु पर्दछ तथा आर्थिक क्षेत्रको प्रवर्द्धनमा निजीक्षेत्रलाई अग्रणी भूमिका कायम गर्नुपर्छ भन्ने हाम्रो बिश्वास छ।

यसरी सुस्पष्ट विचार र लक्ष्य बोकेर राप्रपा नेपाल पुनर्जागृत भएको ६ महिना भित्र आमजनताबाट धेरै ठूलो सद्भाव, समर्थन र सहयोग प्राप्त भएको छ। यसबाट हामी अत्यन्त उत्साहित भएका छौ । नयाँ ढंगबाट पार्टी खडा गर्दाको प्रारम्भिक कष्ट र पिडाको चरण हामीले पार गरेका छौँ। यस अवधिमा हामीलाई साथ दिनुहुने सबै नेपाली दाजुभाई दिदीबहिनीहरुमा म पार्टी अध्यक्षको नाताले हार्दीक आभार व्यक्त गर्न चाहन्छु। साथै, आगामि दिनमा निरन्तर माया र सहयोगको अपेक्षा समेत गर्दछु। सबैमा हार्दिक मंगलमय शुभकामना, सबैको जयहोस्।

कमल थापा
अध्यक्ष